സൂര്യയാത്രയുടെ വിസ്മയച്ചെപ്പ് - കുട്ടികളുടെ ശാസ്ത്ര നോവൽ

വായനകുറിപ്പ് (ചക്കരപ്പാടം)

           ____________________________

പ്രശസ്ത കഥാകൃത്തും ശ്രീ ശ്രീജിത്ത്‌ മൂത്തേടത് എഴുതിയ ചക്കരപ്പാടം എന്ന കുട്ടികളുടെ നോവലാണ് ഞാൻ വായിച്ചത്. പ്രകൃതിയെ സ്നേഹിക്കുന്ന കുട്ടികളുടെ കഥയാണ് ഇത് പ്രകൃതിയെ നശിപ്പിക്കാൻ പോകുന്ന ദുഷ്ടന്മാരായ മനുഷ്യർക്കെതിരെ പോരാടുന്ന കഥ.

ഈ കഥയിൽ സാരംഗ് മുഹമ്മദ്‌ സീന സുഹറ തുടങ്ങിയ ഒരു പറ്റം കുട്ടികളും അധ്യാപകരും ചേർന്ന് പ്രകൃതിവിരുദ്ധ പ്രവർത്തനങ്ങൾക്കെതിരെ പോരാട്ടം നടത്തുന്നു.അവർ സംഘടന രൂപീകരിക്കുന്നു. ഇന്ന് നാം നേരിടുന്ന വലിയ ഭീഷണിയാണ് വരൾച്ച.മനുഷ്യർ തന്നെയാണ് അതിന് കാരണം. മരങ്ങൾ മുറിച്ച് കെട്ടിടങ്ങൾ പണിയുന്നു. നാം വെള്ളപ്പൊക്ക ഭീഷണിയും നേരിടുന്നു. പാടങ്ങളും കുളങ്ങളും നികത്തുമ്പോൾ വെള്ളത്തിന് ഭൂമിയിലേക്ക് ആഴ്ന്നിറങ്ങാൻ സാധിക്കുന്നില്ല. ഈ കഥയിൽ പാടങ്ങളും തോടുകളും നികത്തി കമ്പനി പണിയാൻ ശ്രമിക്കുന്നു. അതിനായി പാവപ്പെട്ട മനുഷ്യരെ പലതും പറഞ്ഞ് പ്രലോഭിപ്പിക്കുന്നു. ചതുപ്പും പാടവും തോടും അതുൾപ്പെടുന്ന തണ്ണീർത്തടവും വേറൊരിടത്ത് കൊണ്ടുപോയി നിർമ്മിച്ചെടുക്കാൻ കമ്പനിക്ക് സാധിക്കുമോ എന്ന ഈ കഥയിലെ കഥാപാത്രം ചോദിക്കുന്നു. പരസ്പര സ്നേഹവും ഒത്തൊരുമയും ഉണ്ടെങ്കിൽ ഒരു ശക്തിക്കും തോടുകളും പാടങ്ങളും നികത്തി കെട്ടിടങ്ങൾ പണിയാൻ സാധിക്കില്ല എന്ന് ഈ കഥ നമ്മെ പഠിപ്പിക്കുന്നു. 

 സ്വാർത്ഥ ലാഭങ്ങൾക്ക് വേണ്ടി പ്രകൃതിയെ ചൂഷണം ചെയ്യുന്ന ഇന്നത്തെ സമൂഹത്തിൽ കുരുന്നുകൾക്ക് പ്രകൃതിയോടുള്ള കളങ്കമില്ലാത്ത സ്നേഹമാണ് ഈ കഥയിലൂടെ വെളിപ്പെടുന്നത്. ഇതിനെതിരെ ഭാവി തലമുറയായ കുട്ടികൾ തന്നെയാണ് പ്രതികരിക്കേണ്ടത്. അവർ ഓരോ വീട്ടിലും മരങ്ങൾ വെച്ച് പിടിപ്പിക്കുന്നു. പക്ഷികളെയും മൃഗങ്ങളെയും സ്നേഹിക്കുന്നു, ഒരു പുതിയ ലോകം സൃഷ്ടിക്കുന്നു

 മനുഷ്യ ബന്ധത്തിൽ ദൈവികവും ആത്മീയവുമായ ഒരു ലയം അനിവാര്യമാണ്. പരിസ്ഥിതി ബോധത്തിന്റെ അഭാവം കൊണ്ടും അത്യാർത്തി കൊണ്ടും മനുഷ്യൻ ചെയ്യുന്ന പ്രകൃതി വിധ്വംസക പ്രവർത്തനങ്ങളുടെ ദൂരവ്യാപക നാശങ്ങൾ വെളിപ്പെടുത്തുന്ന ബാലസാഹിത്യ നോവലാണിത്. വളരെ ലളിതമായ ഭാഷയിൽ എഴുതിയതുകൊണ്ട് കുട്ടികൾക്ക് എളുപ്പം വായിച്ച് മനസ്സിലാക്കാൻ സാധിക്കുന്നു.മാത്രവുമല്ല പ്രകൃതിയുടെ സൗന്ദര്യം വളരെ മനോഹരമായി വർണ്ണിച്ചിരിക്കുന്നു എല്ലാംകൊണ്ടും എനിക്ക് ഈ കഥ വളരെയധികം ഇഷ്ടമായി. 

--- അഞ്ജന സി ഡി