" എസ്കോര്‍ട്ടിംഗ് "

ഭാഗം - ഒന്ന്

ഗ്രേ ഷേഡുള്ള ഇന്നോവ കാര്‍ റസ്റ്റോറന്റിന് മുന്‍ വശത്തെ പാര്‍ക്കിംഗ് ഏരിയയിലേക്ക് ഒഴുകി വന്നു നിന്ന നിമിഷം മുതല്‍ തന്റെ മുന്നില്‍ വെയിറ്റര്‍ കൊണ്ടുവച്ച പതഞ്ഞ് തുളുമ്പിയ മധുര പാനീയത്തെ പോലും ഗൗനിക്കാതെ അയാളുടെ ദൃഷ്ടികള്‍ ചുവന്ന മിനി ടോപ്പും, ജീന്‍സും ധരിച്ച പെണ്‍കുട്ടിയില്‍ തന്നെ പറ്റിപ്പിടിച്ചു നിന്നു. ഇറുകിപ്പിടിച്ച ജീന്‍സിന്റെ വടിവിലും മുഴുപ്പിലും അരിച്ചു നടന്ന തന്റെ കണ്ണുകളെ പിന്‍വലിക്കാനാവാതെ ഉഴറിയ അയാളുടെ നേരെ പെണ്‍കുട്ടി ഇടക്കിടെ പാളി നോക്കുന്നുണ്ടായിരുന്നു. ഒപ്പം വന്ന ചെറുപ്പക്കാരനോടെന്തോ അടക്കം പറഞ്ഞ് അവള്‍ പൊടുന്നനെ അയാളുടെ എതിര്‍ കസേരയില്‍ വന്നിരുന്നപ്പോള്‍ അയാള്‍ക്ക് സ്വപ്നം കാണുന്നതു പോലെ തോന്നി. കൈകള്‍ മേശമേലൂന്നി, ഒട്ടൊന്ന് കുനിഞ്ഞ് അവള്‍ അയാളുടെ കണ്ണുകളിലേക്ക് നോക്കി.

"എസ്ക്യൂസ്മി സര്‍... ഡൂ യൂ ലൈക്ക് റ്റു ഹാവ് സം ഫണ്‍ വിത്ത് മീ ?”

ഇമ ചിമ്മാതെ തന്നെ അയാള്‍ മറുപടി പറഞ്ഞു.

“യാ.. ഷുവര്‍..”

“ദെന്‍... പ്ലീസ് ഹാവ് മൈ കാര്‍ഡ്"

വിസിറ്റിംഗ് കാര്‍ഡ് അയാളുടെ കയ്യിലേല്‍പ്പിച്ച് അവള്‍ മുത്തുമണി പൊഴിയും പോലെ ചിരിച്ച് എഴുന്നേറ്റ് തിരിച്ച് പോയി, ചെറുപ്പക്കാരനൊപ്പം കാറില്‍ കയറി. ഇന്നോവ ഒഴുകിയകന്നു. 'എസ്കോര്‍ട്ടിംഗ്' എന്ന് ഭംഗിയുള്ള അക്ഷരങ്ങളില്‍ പ്രിന്റ് ചെയ്ത കാര്‍ഡിലെ നമ്പറുകള്‍ മൊബൈല്‍ കീ പാഡിലമര്‍ന്നതും, കാള്‍ ബട്ടന്‍ പ്രസ്സ് ചെയ്തതും മുഴു ബോധത്തോടെയായിരുന്നില്ലായെന്ന് അയാള്‍ക്കുറപ്പുണ്ടായിരുന്നു. മറുതലയ്കല്‍ കേട്ട മുത്തു പൊഴിയുന്ന സ്വരം തന്നെ മാടിവിളിക്കുന്നതറിഞ്ഞ അയാള്‍, കഴുത്തിലണിഞ്ഞിരുന്ന സ്വര്‍ണ്ണമാലയില്‍ തഴുകി. മുന്നിലിരുന്ന നുരച്ച മധുര പാനീയം കുടിച്ച് വറ്റിക്കാന്‍ പോലും നില്‍ക്കാതെ ടാക്സി പിടിച്ച് പൂന്തേന്‍ ലക്ഷ്യമാക്കി പറന്നു.

ഭാഗം - രണ്ട്

തനിക്ക് ചുറ്റും ഈച്ചകളെ പോലെ ആര്‍ക്കുന്ന കൊതുകുകളുടെ കടിയും, തുറന്ന ടോയ്ലറ്റില്‍ നിന്നും വരുന്ന ദുര്‍ഗന്ധവും സഹിക്കവയ്യാതെ ഇരുമ്പഴികളില്‍ മുഖം ചേര്‍ത്ത് കണ്ണുനീര്‍ വാര്‍ക്കുന്ന അയാള്‍ക്ക് ഇപ്പോള്‍ പൂര്‍ണ്ണമായും സ്വബോധമുണ്ടെന്ന് തോന്നിച്ചു. അഴികള്‍ക്ക് പുറത്ത് വരാന്തയില്‍ മേശമേല്‍ തലചായ്ച്ച് കൂര്‍ക്കം വലിച്ച് ഉറങ്ങുന്ന കൊമ്പന്‍ മീശക്കാരന്‍ കോണ്‍സ്റ്റബിളിനെ അയാള്‍ അസൂയയോടും തെല്ല് ഭയപ്പാടോടും കൂടി നോക്കി. പണയം വയ്ക്കാന്‍ പോലും കാത്തുനില്‍ക്കാതെ ആദ്യം കണ്ട ജ്വല്ലറിയില്‍ വിറ്റ സ്വര്‍ണ്ണമാലയെയും, അവളോടൊത്ത് കണ്ട ചെറുപ്പക്കാരനെയേല്‍പ്പിച്ച നോട്ട് കെട്ടിനെയും, ആലസ്യത്തോടെ ഹോട്ടല്‍ മുറിയുടെ വാതില്‍ തുറന്നപ്പോള്‍ മുന്നില്‍ മീശ വിറപ്പിച്ച് നിന്ന ഇന്‍സ്പെക്ടറുടെ മുഖവും, തുടര്‍ന്ന് അവളോടൊപ്പം ജീപ്പില്‍ ഇവിടം വരെയെത്തിയതിനെ കുറിച്ചും, ഇവിടെ നിന്നും ലഭിച്ച ചില്ലറ താഡനങ്ങളെയും കുറിച്ചുമെല്ലാം അയാള്‍ക്ക് നല്ല ബോധമുണ്ടായിരുന്നു. ഇല്ലാതിരുന്നത് 'എസ്കോര്‍ട്ടിംഗിനെവിടെയോ വച്ച് അപ്രത്യക്ഷയായ അവളെ കുറിച്ചുള്ള ഓര്‍മ്മകള്‍ മാത്രമായിരുന്നു.